Torrat cun sa de tres annualidades su progetu “Limba de vida”. Su progetu subra comunale finantziadu cun fundos de sa Presidèntzia de su Consìgiu de sos Ministros in cunforma a sa L.482/99 e a sa LR 22/2018 pertocat sos comunes de Ossi (cabufila), Carzeghe, Laerru, Martis, Piaghe, Uri e Ùsini, su coordinamentu iscientìficu est de s'Istitutu Camillo Bellieni de Tàtari. S'operadora ingarrigada pro su Comune de Carzeghe est Daniela Masia Urgu.
In su cursu de su progetu ant a èssere realizadas diversas fainas pro tota sa tzitadinàntzia: 4 cursos de formatzione linguìstica in presèntzia e in lìnea, laboratòrios culturales dedicados a s'iscoberta de sa figura de Giovanni Maria Angioy pro sos pitzinnos de sas iscolas de su territòriu, 2 laboratòrios de letura pro mannos, sa realizatzione de un unu podcast cun intervistas e contos subra su territòriu, fainas de animatzione pro mannos e pitzinnos finas in collaboratzione cun bibliotecas, assòtzios culturales de su territòriu e iscolas.
At a èssere finas proposta sa segunda editzione de su Prèmiu de poesia dedicadu a Michele Pinna, intelletuale semper impignadu in sa valorizatzione de sa limba e de sa cultura sarda, finas fundadore de s'Istitutu Bellieni de Tàtari.
S'isportellu at a èssere abertu a su pùblicu pro sa tradutzione de materiales personales e consulèntzia pro sos entes locales, siat pro sa tradutzione chi pro sa realizatzione de artìculos e àteros materiales in limba sarda mediante sos cales difùndere, promòvere e dare visibilidade a su territòriu.
Totu sas fainas ant a èssere documentadas in sa pàgina facebook “Limba de vida 3”, in sa pàgina instagram “limba_de_vida”, in su giassu istitutzionale de su Comune. At a èssere possìbile cuntatare s'operadora a s'indiritzu mail susarduestintotue@gmail.com o in in s’ufìtziu comunale su mèrcuris dae sas noe (9;00) a sas duas (14:00)
Su progetu torrat in sa faina finantziada dae sa Regione Autònoma de sa Sardigna cun sos fundos de sa L 482/99 e LR 22/18″.
